Droni 41′

Shkruan: Petrit Osmani Janë bërë 6 vjet prej ndeshjes Serbi-Shqipëri, e luajtur në Beograd. Një ndeshje që kishte nisur qysh prej shortit, dhe tensioni ishte rritur çdo ditë e më shumë, për të kulmuar ditën e ndeshjes. Tifozët shqiptare nuk u lejuan të përcillnin Kombëtaren e tyre, dhe për të arsyetuar këtë mungesë, e edhe për t’iu kundërvënë mos-gatishmërisë së palës serbe për të pranuar tifozët shqiptarë, këta të fundit bënë një gjetje mjaft kreative, për të cilën foli bota, Dronin. Në fakt zbulimin e kësaj fluturakeje bota e kishte bërë vite më herët, por askush nuk ishte kujtuar, ose thënë më qartë, askush nuk kishte menduar se një ditë do të përdorej në një ndeshje futbolli. Luhej minuta e 41’të e takimit, rezultati ishte i bardhë, pa gola. Çirrjeve, sharjeve, ofendimeve në baza racore, duke i dëshiruar vdekjen kundërshtarit nga tifozët serb, sa vinin e bëheshin më të zhurmshme. Një pamje e marrë nga kamerat, për një fluturake që po valviste një pëlhurë të ngjyrosur kuq e zi, tërboi të pranishmit në stadiumin e Partizanit të Beogradit. Ndeshja u ndërpre, të gjithë ishin me sytë nga qielli, edhe tifozët që shanin e bërtisnin dëshpërimisht, e që dukeshin më tepër sikur bisha të plagosura që po shihnin vdekjen me sy. Ka shumë tifozeri nga të katër cepet e botës, më të zhurmshëm, më të mëdhenjë në numër, më pasionantë ndoshta, por kreativiteti dhe gjenialiteti i kësaj vepre, bëri që gjithë bota të flas për dronin e Ismail Morinës dhe për shqiptarët në përgjithësi. Ndeshja nga fusha, u zhvendos në zyrat e Gjykatës sportive në Lozanë, atje ku përfundimisht “bishat” do merrnin, goditjen vdekjeprurëse që i la jashtë Europianit, dhe hapi rrugën e Shqipërisë për debutimin historik në “Francë 2016”. Pjesa tjetër, është histori…